Middelburg Speenoud Futurity

Aan alle Saalperdhings- en merrie-eienaars in Suid-Afrika:Waarom verdien ons so min prysgeld met ons vullens? Is daar nie ‘n manier om hierdie toestand van sake te verbeter tot voordeel van beide die klein en die groot teler nie?

Nadat ek gesien het hoe suksesvol die All American Cup van Jim Aikman in Indiana is en my eie meer onlangse ondervinding met die Blue Grass Futurity waar die hingsvul, Sir Clarence Ronald, meer as $30000 verdien het as 6 maande oue vul, het dit my aan die dink gesit.

Ons behoort ‘n soortgelyke “incentive” program vir telers in Suid-Afrika te begin.
Na deeglike oorweging en konsultasie met telers is besluit om hierdie program reeds hierdie teel seisoen te begin sodat ons die voorgestelde klas alreeds in 2011 kan aanbied.Dit sal die Middelburg Speenoud Futurity (MSF) genoem word en sal elke jaar saam met Middelburg (Oos-Kaap) skou plaasvind (begin Maart)

Die rede hoekom op Middelburg is voor die handliggend. Middelburg het ‘n klomp eerstes in die S.A. perde bedryf en dit is sentraal. Die skou is ook ideaal om speenoudvullens te skou sonder dat hulle geskeer hoef te word. Mei in Bloemfontein is te naby aan die winter en Parys is weer te laat. Die meeste vullens word tussen September en Desember gebore wat Middelburg se datum ideaal maak.

Aangeheg is die basiese reëls van hierdie Futurity. Die eerste wat moet plaasvind is die nominasie (skenking) van hingste se dekkings. Ek sal dit waardeer as almal binne die volgende 10 dae (sluitingsdatum 10 November) ‘n aanduiding vir my kan gee wie hierin sal belangstel dat ek kan sien of dit die moeite werd gaan wees om die proses amptelik te begin met die oopmaak van ‘n bankrekening en die ontwerp van ‘n webblad, waar al die inligting en ook nominasie vorms beskikbaar sal wees. ‘n Lys van die genomineerde hingste sal ook op die webblad beskikbaar wees sodat merrie-eienaars solank kan begin besluit op watter hings hulle by die veiling, (wat slegs die eerste keer tydens Parys skou gehou sal word en daaropeenvolgens op Bloemfontein), kan bie om ‘n ekslusiewe vul te kan skou op die eerste Futurity wat in 2011 gehou sal word.

Dankie vir julle belangstelling en vir die lees van die voorstel! Ek dink daar is ‘n interessante bloeitydperk wat vir ons Saalperdbedryf voorlê as ons kreatief begin dink!Ek het ongelukkig nie alle hingseienaars se e-pos adresse of kontak nommers nie. Indien julle van iemand weet wat dalk sou belangstel en nie hierdie e-pos of kopie gekry het nie, stuur dit asb vir die persoon of persone, en indien hulle belangstel kan hulle my kontak by newline@mweb.co.za
huis tel 021 9888234
of selfoon 082 807 3342.

Vriendelike groete,
Ross Millin